पुणे लोकसभा मतदारसंघाचे उमेदवार गिरीश बापट यांनी उमेदवारी अर्ज केला दाखल

पुणे : शिवसेना-भाजप महायुतीचे पुणे लोकसभा मतदारसंघाचे उमेदवार गिरीश बापट यांनी मंगळवारी आपला उमेदवारी अर्ज दाखल केला. राज्याचे महसूल मंत्री चंद्रकांत पाटील यांच्या प्रमुख उपस्थितीमध्ये पुण्यात मोठी रॅली काढण्यात आली.

पुण्याचे ग्रामदैवत श्री कसबा गणपतीचे दर्शन घेऊन रॅलीस सुरुवात करण्यात आली. या रॅलीमध्ये शिवसेनेच्या आमदार डॉ. नीलम गोऱ्हे, खासदार अनिल शिरोळे, रासपचे महादेव जानकर, शिवसेनेचे चंद्रकांत मोकाटे आणि कार्यकर्ते मोठ्या संख्येने सहभागी झाले होते. ही रॅली फडके हौद चौक, नरपतगिरी चौक मार्गे जिल्हाधिकारी कार्यालयावर पोहोचली. 'गिरीश बापट आगे बढो, हम तुम्हारे साथ है' 'महायुतीचा विजय असो ' या घोषणांनी परिसर दुमदुमून गेला होता.