भरारी पथकांच्या वाहनांवर जीपीएस यंत्रणा

नंदुरबार : लोकसभा निवडणुकीत आदर्श आचारसंहितेच्या पालनाबाबत लक्ष ठेवण्यासाठी नियुक्त करण्यात आलेल्या भरारी पथक, सहायक खर्च नियंत्रण निरीक्षक आणि राज्य उत्पादन शुल्क विभागाच्या वाहनांवर जीपीएस यंत्रणा बसविण्यात आली असून त्याद्वारे नियंत्रण कक्षातून वाहनांच्या हालचालींवर लक्ष ठेवले जाणार आहे.

पथकांचे काम अधिक कार्यक्षमपणे व्हावे आणि त्यांच्या कामकाजात पारदर्शकता रहावी यासाठी एकूण 34 वाहनांवर जीपीएस यंत्रणा बीएसएनएलच्या सहकार्याने बसविण्यात आली आहे. नंदुरबार लोकसभा मतदारसंघात प्रत्येक विधानसभा क्षेत्रातील चार भरारी पथकांच्या वाहनावर, उत्पादन शुल्क विभागाच्या चार वाहनांवर आणि सहायक खर्च निरीक्षक पथकाच्या सहा वाहनांवर ही यंत्रणा बसविण्यात आली आहे.

भरारी पथकाद्वारे निवडणुकीत पैसे आणि वस्तूंची देवाण-घेवाणीसोबत आचारसंहितेच्या पालनाबाबत लक्ष दिले जाणार आहे. अवैध दारुचा निवडणुकीत होणारा उपयोग रोखण्यासाठी उत्पादनशुल्क विभागाची पथके चोवीस तास कार्यरत राहणार आहेत. सहायक खर्च निरीक्षकांच्या पथकाद्वारे विविध रॅली-सभा व इतर माध्यमातून निवडणुकीत होणाऱ्या खर्चाबाबत माहिती संकलित करण्यात येणार आहे.

मुक्त आणि नि:ष्पक्ष वातावरणात निवडणुका होण्यासाठी निवडणूक यंत्रणा सज्ज झाली असून जीपीएस यंत्रणेमुळे जिल्हा निवडणूक अधिकाऱ्यांना मतदारसंघातील विविध भागावर लक्ष ठेवण्याबाबत योग्य नियोजन करणे शक्य होणार आहे.

जीपीएस प्रणालीमुळे वाहनाचे निश्चित ठिकाण कळणार असल्याने पथकाचे कामकाज पारदर्शक होण्याबरोबरच आवश्यतेनुसार पथकाला सुचना देणे शक्य होणार आहे. जिल्हाधिकारी बालाजी मंजुळे स्वत: जिल्ह्यात विविध ठिकाणी भरारी पथकांना भेट देऊन पथकाच्या कामकाजाची पाहणीदेखील करीत आहेत.