महापालिकेने पाणीपुरवठा नियोजनांत बदल करावा

पिंपरी : पिंपरी-चिंचवड शहरातील पाणीपुरवठा नियोजनांत बदल करण्यात यावा, अशी मागणी मानव कांबळे यांनी श्रावण हर्डीकर यांच्याकडे लेखी निवेदनांद्वारे केली आहे.

दिलेल्या निवेदनांत त्यांनी म्हटले आहे की, मागील पंधरा दिवसापासून संपूर्ण शहरात आठवड्याचून एक दिवस पूर्ण पाणीपुरवठा बंद असे धोरण राबविण्यात येत आहे. त्यामुळे अनेक समस्या निर्माण झाल्या आहेत. दररोज एक वेळ साधारण दोन तास असा पाणी पुरवठा करत असतो, तोच पुरवठा दररोज फक्त अर्ध्या तासाने कमी केला तर दर आठवड्याला एक दिवस पूर्ण कोरडा अशी स्थिती येणार नाही. नागरिकांनी पाणी काटकसरीने वापरण्याची सवय लागेल. अजूनही काही भागामध्ये दोन्ही वेळा पुरवठा केला जात आहे.

पाण्याच्या टंचाईमुळे शहरातील बांधकामे पूर्णपणे बंद करणे आवश्यक होते, परंतु बिल्डर लॉबीच्या दबावाखाली ही कामे बंद केली जात नाहीत. या बांधकामांवर पिण्याच्या पाण्याचा सर्रास वापर केला जातो. शहरात जी मोठ्या प्रमाणावर अनधिकृत बांधकामे सुरु आहेत, त्याला कुठले पाणी वापरले जात आहे? याकडे मा. आयुक्त लक्ष देणार आहेत का नाही? महापालिकेतील काही 'प्रभावी' नगरसेवकांच्या दबावाखाली त्यांच्या भागातील पाणीपुरवठ्यावर कुठल्याही प्रकारचे नियंत्रण आणले जात नाही. शहरात मोठ्या प्रमाणावर 'पाणी गळती' होत आहे, त्याच्या देखभालीचे काम प्रभावीपणे केले जात नाही.

महापालिकेतील संबंधित अधिकाऱ्यांना या सर्व बाबींची माहिती आहे. परंतु 'विशिष्ठ' कारणांमुळे या वास्तवाकडे दुर्लक्ष केले जात आहे. या सर्व बाबींवर नियंत्रण आणले तर आताच्या टंचाईच्या काळातही शहरात योग्य दाबाने नियमितपणे दोन वेळ पाणीपुरवठा करता येईल. त्याचबरोबर महापालिकेच्या वतीने चालविण्यात येणारे पोहण्याचे तलाव ताबडतोब बंद करण्यात यावेत. प्रशासकीय कारभारातील गलथानपणा, बिल्डर लॉबी आणि राजकीय नेत्यांचे आर्थिक हितसंबंध, तसेच कर्तव्यात कसूर करणारे पालिका कर्मचारी यांची शिक्षा सामान्य करदात्या नागरिकाने का भोगावी? असेही म्हटले आहे.